Новиот документарен филм „Путин против Западот“ не откритива нови работи кога станува збор за тоа како дојдовме до уште една крвава војна во Европа, но нè потсетува дека војната во Украина можеше да се избегне со поинаква политика кон Русија. Во целата приказна нема целосно невини луѓе, но исто така е јасно дека има само еден директен виновник за руската инвазија на Украина, а тоа е Владимир Путин – коментираат британските критичари по повод новиот документарен филм што во три продолженија се емитуваше на Би-Би-Си.
Документарниот серијал „Путин против Западот“ (Putin vs. The West) ги покажува односите меѓу САД, Европската Унија и Русија, а автор на сценариото е Норма Перси, позната по серијалот „Смртта на Југославија“. Перси успеа да дојде до многу важни соговорници, меѓу кои и поранешни британски премиери и претседатели на Европската комисија, како и други европски лидери или американски дипломати. Сепак, забележливо е дека меѓу соговорниците ја нема поранешната германска канцеларка Ангела Меркел, иако често се споменува и може да се види во овој документарен филм.
Секој од соговорниците има своја анегдота за Путин, а онаа што ја кажа поранешниот британски премиер Борис Џонсон најмногу одекна во јавноста. Во февруари 2022 година, Џонсон одржа средба со Путин и го предупреди дека инвазијата на Украина ќе доведе до санкции од Западот и поголем број сили на НАТО на руските граници. Тој, исто така, му ветил на Путин дека Украина нема да се приклучи на НАТО „во догледна иднина“.
– Во еден момент Путин ми се закани и ми рече: „Борис, не сакам да те повредам, но со проектил ќе треба само една минута“ или нешто слично. Но мислам, судејќи по многу опуштениот тон кој го имаше, по некој вид дистанцираност, само ги слушаше моите обиди да го натерам да преговара – раскажува Борис Џонсон.
Документарецот на Би-Би-Си има и елементи на сапунска опера, бидејќи понекогаш се чини дека толку многу во меѓународните односи зависи од личните симпатии на лидерите, како и од протоколите на меѓусебните средби. На пример, во еден момент, светските лидери не одвојуваат доволно време за да разговараат за безбедносните прашања, бидејќи брзаат да присуствуваат на свечена вечера со британската кралица.
Генерално, формалните вечери се прилично голема тема во текот на документарецот: луѓето доцнат на нив, се водат расправии или се помируваат, луѓето уживаат и очигледно добро јадат. Потоа повторно, се чини дека претседателите и премиерите треба да комуницираат повеќе и подобро. Самитите како Г8 или Г20 функционираат како брзо запознавање и често се непрактични и не ги носат посакуваните резултати. На пример, на еден од тие самити, Обама и Путин успеале да разговараат сами само околу 15 минути.
