Во Националниот диспечерски центар на српската електроенергетска мрежа денеска беше потпишан договорот за пакетот енергетска поддршка на Европската унија за Србија, вреден 165 милиони евра.Во присуство на претседателот на Србија, Александар Вучиќ и шефот на Делегацијата на ЕУ во Србија, Емануел Жиофре, договорот го потпишаа министерката за евроинтеграции Тања Мишчевиќ и заменик-шефот на Делегацијата на ЕУ во Србија, Пламена Халачева.
Жиофре рече дека договорот е конкретен пример за солидарноста на ЕУ кон Србија.
„Руската инвазија на Украина го наруши снабдувањето со енергија и претставува огромни ризици за нашата економија. ЕУ реагираше за да ги заштити граѓаните и економијата со држење заедно и одлучно дејствување, а резултатите се импресивни, снабдувањето со енергија е диверзифицирано и ја зголемивме енергетската безбедност“, рече Жиофре.
Тој додаде дека европската економија ќе продолжи да расте во 2023 година, инфлацијата ќе се намали, а вработеноста ќе остане на високо ниво.
„Со држење заедно, можеме да успееме во овие тешки времиња, а тоа важи и за Србија и за Западен Балкан“, рече Жиофре.
Тој рече дека претседателката на Европската комисија, Урсула фон дер Лајен, за време на нејзината посета на Ниш во октомври минатата година, рече дека што и да прави ЕУ, во неа е вклучен и Западен Балкан, „бидејќи сме толку меѓусебно поврзани“.
Вучиќ: Често го потценуваме она што ЕУ го прави за Србија
Вучиќ се заблагодари на ЕУ за огромната помош и рече дека Србија за еден ден добила еден процент од буџетот од ЕУ.
„Добивме еден процент од буџетските приходи. За само еден ден добивме еден процент на подарок од ЕУ. Сакам луѓето да го знаат тоа, бидејќи ние често го потценуваме она што ЕУ го прави за нас. Своите пари од даночните обврзници ги даваа на граѓаните на Србија“, рече Вучиќ.
Финансиската поддршка од ЕУ ќе послужи за спроведување на енергетскиот патоказ на српската влада, субвенциите за ранливите домаќинства и заштитата на малите и средни претпријатија.
Се очекува дека годинава бројот на домаќинства што ќе добијат финансиска поддршка од 68.000 ќе се зголеми на 191.000, а помош ќе добијат околу 70.000 мали бизниси.
Средствата од пакетот ќе бидат искористени и за стимулации за енергетска ефикасност и обновливи извори на енергија, субвенционирање на соларни панели, топлински пумпи за приватни куќи, мали и средни претпријатија и јавни објекти.
Една од мерките што ќе се финансираат е зголемувањето на конкуренцијата на пазарите на гас и електрична енергија, што подразбира одвојување и сертифицирање на сите оператори со гас, отворање на пазарот на гас и спроведување на аукции за производителите на електрична енергија од обновливи извори.
На потпишувањето на договорот присуствуваа министерот за финансии Синиша Мали, министерката за рударство и енергетика Дубравка Ѓедовиќ и генералниот директор на „Електромреж Србија“ Јелена Матејиќ.
