Најсилниот земјотрес во Туркије од почетокот на векот предизвика материјална штета, што може да ја чини Анкара близу 84,1 милијарди долари, соопшти на Конфедерацијата на турски претприемачи и бизнисмени (ТУРКОНФЕД).
Во извештајот на ТУРКОНФЕД, објавен во текот на викендот, се наведува дека реновирањето на илјадници домови ќе чини 70,8 милијарди долари, загубата во националниот доход ќе изнесува 10,4 милијарди долари, додека загубата од работните денови би била 2,9 милијарди долари.
Според извештајот, главните трошоци ќе бидат поврзани со обновување на становите, инфраструктурата, како и задоволување на краткорочните, среднорочните и долгорочните потреби за засолништа на стотици илјади луѓе кои останаа без покрив над главата.
Претседателот Реџеп Тајип Ердоган изјави дека обновата на домовите ќе заврши во рок од една година и дека Владата подготвува програма за „обнова на земјата“.
Околу 13,4 милиони луѓе живеат во десетте области погодени од земјотресот минатата недела, што е околу 15 отсто од вкупното население. Регионот произведува речиси 10 проценти бруто домашниот производ. Ефектот на земјотресот врз БДП најверојатно нема да биде толку силен како што беше по земјотресот во северозападна Туркије во 1999 година.
И покрај тоа, економистите и официјалните лица сметаат дека земјотресот ќе го намали економскиот раст до два процентни поени годинава. Владата предвидува раст од пет отсто годинава, а прогнозите пред земјотресот беа 5,5 отсто.
