Чеченскиот лидер Рамзан Кадиров изјави дека Москва ќе ги постигне своите цели во Украина до крајот на годината, а во нив спаѓаат, меѓудругото, и освојување на градовите Киев, Одеса и Харков.
Во интервју емитувано на главниот канал на државната телевизија Росија-1, тој рече дека Русија има сила да го преземе главниот град Киев, од кој беше протерана во првите недели од војната, и оти мора да го преземе вториот украински град Харков, како и главното украинско пристаниште Одеса.
– Верувам дека до крајот на годината стопроцентно ќе ја завршиме задачата што ни беше поставена денеска – рече Кадиров.
Силите на Кадиров одиграа значајна улога во војната во Украина по инвазијата на Русија пред речиси една година, и тој склучи неформален сојуз со водачот на платениците од групата Вагнер, Евгениј Пригожин и другите националисти кои ја поддржуваат војната.
