Дизни отстрани епизода од Симпсонови во која се спомнуваат кинеските работни логори од својот стриминг сервис во Хонг Конг.
Медиумите оваа недела објавија за отсуство на епизодата „One Angry Lisa“ од последната сезона, но не е јасно кога е отстранета. Дизни одби да одговори на прашањата на Би-Би-Си.
По усвојувањето на неколку контроверзни закони, загриженоста за цензурата расте во Хонг Конг.
За разлика од остатокот од Кина, Хонг Конг претходно имаше пристап до повеќе граѓански слободи, но Пекинг ги ограничи тие права откако големите продемократски протести го потресоа градот во 2019 година.
Во епизодата, која беше премиерно прикажана минатиот октомври, беа прикажани слики од Кинескиот ѕид за време на часовите за вежбање на Марџ Симпсон. За време на часот, предавачот коментира: „Погледнете ги чудата на Кина: рудници за биткоин, кампови за принудна работа каде децата прават паметни телефони“.
Би-Би-Си објави дека стотици илјади етнички малцинства во западниот регион Ксинџијанг се принудени на физичка работа. Кинеската влада го негира ова и вели дека фабриките се дел од доброволна програма за „ублажување на сиромаштијата“.
„Симпсонови“ се прикажуваат со прекини во Кина од раните 2000-ти. На кинеските стриминг сајтови може да се најдат епизоди од новата сезона, но не и тие сцени, пишува Би-Би-Си.
Цензурата на западната телевизија е вообичаена во континентална Кина, а критичарите велат дека оваа практика е во пораст во Хонг Конг.
