Компанијата „Мајкрософт“ планира да го намали бројот на вработени за околу пет отсто, односно за околу 11.000 луѓе, објави „Скај њуз“ повикувајќи се на свои извори.
Ова ќе бидат нови отпуштања во американскиот технолошки сектор, откако Amazon и Meta објавија дека ќе го намалат бројот на вработени поради падот на побарувачката за нивните производи и услуги.
Изворите наведуваат дека „Мајкрософт“ би можел да го намали бројот на нови вработувања за една третина.
Американската компанија одби да ги коментира овие извештаи.
Мајкрософт имаше 221.000 вработени со полно работно време на 30 јуни, вклучувајќи 122.000 во САД и 99.000 ширум светот, според податоците на компанијата.
Технолошкиот гигант ќе ги објави своите квартални резултати на 24 јануари.
