Глобалното затоплување веќе почна да остава бројни последици за човечкиот вид и животната средина, а ниту еден дел од планетата нема да остане недопрен од климатските промени што се случуваат, вклучително и Хрватска. Угледниот американски метеоролог и климатолог Џон Тухи-Моралес за ХРТ откри што ја чека Хрватска и како ќе изгледа туризмот како резултат на тоа.
Џон Тухи-Моралес, попознат само како Џон Моралес, до неодамна метеоролошката ѕвезда на американската телевизија Ен-Би-Си Мајами, минатата недела уживаше во парче хрватска убавина и го промовираше на своите социјални мрежи, каде што го следат стотици илјади луѓе. Тој ги посети Загреб, Националниот парк Плитвички езера, Ровињ и Пула.
„Вие во Хрватска, како и целиот Медитеран, дефинитивно треба да очекувате дека оваа област ќе стане потопла. И да, тоа навистина значи дека ќе почнете да се чувствувате како да сте во тропските предели. Како што се оддалечувате од брегот, температурата ќе се зголемува, бидејќи морето барем малку ќе се „олади“, но во внатрешноста ќе стане многу тешко и топло. Можете да го очекувате тоа во средината на векот, околу 2050 или 2070 година“.
„Ќе имате повеќе топли месеци, но во исто време, кога е најтопло, во јули и август, на туристите ќе им биде многу тешко, дури до тој степен што ќе им се закануваат болести поради горештините. Можно е во одредени градови во тие месеци да стане претопло за развој на туризмот“, рече тој.
„Поради климатските промени, температурата на морето се менува и расте, па бележиме миграции на различни морски видови. Покрај тоа, треба да се земе предвид и порастот на нивото на морето. Плажите ќе се намалат, ќе ги има помалку, тоа ќе влијае на туристите бидејќи ќе имаат помалку места за уживање. Но, во исто време морето ќе ја ублажи високата температура на брегот. Притисокот врз него затоа ќе биде уште поголем бидејќи многумина ќе сакаат да избегаат од жештините“, изјави Џон Моралес, американски метеоролог и климатолог во емисијата „turizam.hrt“ на ХРТ.
