На британската страна на Каналот, во тек е операција за спасување мигранти, во која учествуваат и британските и француските спасувачки служби, изјави во средата официјален претставник на француската поморска префектура.
Мал брод со мигранти потона во близина на југоисточниот брег на Англија, а некои од луѓето во него се удавија, објави во средата Би-Би-Си.
Агенциите јавуваат дека во операцијата за спасување на мигрантите учествуваат француски хеликоптер и поморски брод, како и британската Кралска крајбрежна стража.
Портпаролот на Министерството за одбрана потврди дека инцидентот е во тек без да даде повеќе детали.
„Инцидентот е во тек и немаме повеќе информации“, се вели во соопштението.
Агенцијата за крајбрежна стража соопшти дека ја координира операцијата во врска со „инцидентот со мал брод кај Кент“.
Терминот „мал брод“ генерално се однесува на пловните објекти што мигрантите ги користат за да го преминат Ла Манш за да влезат во ОК.
Од почетокот на годината по тој опасен пат поминале речиси 45.000 мигранти, што е зголемување во однос на 30.000 минатата година, додава агенцијата АФП.
