Српскиот претседател Александар Вучиќ доби акредитиви од новиот апостолски нунциј на Ватикан во Србија, архиепископот Санта Ганѓеми и изрази уверување дека односите меѓу двете земји ќе добијат на интензитет.
Вучиќ и Ганѓеми разговарале за бројни теми од значење за билатералните односи, за кои се вели дека се засновани на искрено меѓусебно почитување, соопшти Кабинетот на претседателот на Србија.
Вучиќ му се заблагодари на Ватикан „за принципиелниот став“ за територијалниот интегритет на Србија, односно за непризнавањето на независноста на Косово и изјави дека во Римокатоличката црква „постои подготвеност да се слушнат и разберат ставовите на Србија. “, се наведува.
Според информациите, Ганѓеми му пренел уверување на Вучиќ дека Ватикан нема да го промени ставот за независноста на Косово, како и поздрави од поглаварот на Римокатоличката црква Франциск. Вучиќ упати „топли поздрави“ до папата Франциско и честитки за претстојниот Божиќ, се додава во соопштението.
