Западните елити се обидуваат да ја задржат својата доминација на светската сцена со сите можни средства, со што ја зголемуваат опасноста од конфликт, изјави во петокот рускиот претседател Владимир Путин.
„Потенцијалот за избувнување на конфликти во светот расте како директна последица на напорите на западните елити да ја задржат својата политичка, финансиска, воена и идеолошка доминација со сите можни средства“, рече Путин.
Рускиот лидер зборуваше во видео порака упатена до министрите за одбрана на земјите членки на Шангајската организација за соработка и групата поранешни советски земји. „Тие (елитите) свесно го умножуваат хаосот и ја отежнуваат меѓународната ситуација“, рече Путин во пораката објавена од Кремљ.
Путин го обвини и Западот дека ја „експлоатира“ Украина и го користи украинскиот народ како топовско месо во конфликтот со Русија.
Путин постојано ја карактеризира војната во Украина – која Москва секогаш ја нарекува „специјална воена операција“ – како конфликт меѓу Русија и Западот и ги критикува земјите кои обезбедуваат воена и финансиска помош за Украина.
Киев, европските земји и Вашингтон велат дека Москва се обидува, под превезот на грижа за сопствената безбедност, да освои големи делови од Украина и да го собори нејзиниот претседател Володимир Зеленски преку цинична агресија против проевропска соседна земја.
