Најмалку 90 отсто од светското население има некаков вид имунитет на коронавирусот, изјави генералниот директор на Светската здравствена организација (СЗО) Тедрос Аданом Гебрејесус, но предупреди на намалената будност на населението кон овој вирус.
„Тој пад на будноста ја остава отворена вратата за појава на нова варијанта која најверојатно ќе се прошири и ќе ја замени моментално доминантната омикронска варијанта“, рече Гебрејесус на прес-конференција.
Според него, најмалку 90 отсто од светската популација моментално има некаква форма на имунитет на вирусот САРС-КоВ-2, било преку претходно заболување или преку вакцинација.
Гебрејесус рече дека е рано да се каже дека пандемијата на коронавирус е завршена, пишува Радио Слободна Европа.
„Сè уште не сме стигнале до крајот. „Недостигот на надзор, тестирање и вакцинација продолжува да создава совршени услови за појава на загрижувачка нова варијанта што може да предизвика висока стапка на смртност“, рече тој.
Според податоците на Институтот Џон Хопкинс, до 2 декември 2022 година се регистрирани 644.620.422 случаи на инфекција со коронавирус.
Бројот на починати е 6.639.588.
