Британските медиуми открија детали за тоа кој ќе го замени кралот Чарлс на службените должности кога тој ќе биде надвор од Велика Британија
Во Велика Британија деновиве главна вест е новиот премиер Риши Сунак, но тамошните медиуми не го заборавија кралското семејство, а се чини дека се познати деталите од првата уставна реформа од владеењето на кралот Чарлс.
Според „Дејли мејл“, министрите и високите функционери на палатата ги финализираат плановите да избегнат каква било можност принцот Хари или неговиот вујко принцот Ендру да бидат вклучени во државни прашања кога Чарлс е отсутен.
Според предлозите кои наскоро треба да бидат претставени во парламентот во рок од неколку недели, кралот ќе може да ангажира поширок круг на кралски пратеници за извршување на рутински уставни должности кога ќе биде надвор од земјата.
Дејли мејл дознава дека овие предлози биле разгледани пред неколку месеци, со одобрение на покојната кралица Елизабета. Во моментов, правилото е дека кога монархот е отсутен од која било причина, државните работи – како што се одобрувањата за повеќето назначувања и законодавството – може да ги извршуваат двајца државни советници. Според одредбите на Регентските акти од 1937 и 1953 година, тие можат да бидат назначени меѓу четворицата постари возрасни лица во редот на наследување, плус брачниот другар на монархот. Што би значело дека денес овие улоги можат да им припаднат на кралицата Консорт Камила, принцот Вилијам, принцот Хари, принцот Едвард и принцезата Беатрис.
Но, кралот би можел да ја прошири таа листа по своја дискреција, со опција да ги вклучи неговите двајца браќа и сестри, Ана и Едвард.
Имајќи предвид дека Чарлс и Камила најверојатно наскоро ќе отпатуваат во странство, оваа одлука наскоро би можела да стапи во сила, а воедно ќе биде првпат монархот да биде надвор од земјата по седум години.
Имено, покојната кралица Елизабета последен пат беше надвор од Велика Британија на Самитот на Комонвелтот во Малта во 2015 година, а меѓу оние кои претходно ги постави за државни советници беа и војводите од Сасекс и Јорк.
Сепак, принцот Хари оттогаш се повлече од кралските должности и се пресели во странство, додека принцот Ендру беше исклучен од јавниот живот откако беше откриено дека бил близок со осудениот педофил, покојниот Џефри Епштајн.
Претставниците на палатата се свесни дека во време на големи национални, меѓународни и економски турбуленции, би било многу непријатно ако водењето на владата наеднаш зависеше од било кој од двајцата, па веројатно е вмешаност и на други членови на семејството. На овој начин никој не треба да се навредува и работата ќе може нормално да се одвива.
