Шефот на украинската воена разузнавачка служба Кирил Буданов даде интервју за „Украинска правда“, каде меѓу другото кажа дека архитектот на анексијата на украинските територии, 60-годишниот Сергеј Киријенко има амбиции да стане наследник на Путин.
Според Буданов, другите претенденти, како заменик-претседателот на Советот за безбедност на Руската Федерација Дмитриј Медведев, немаат шанси.
Пишувајќи за Киријенко, британски Телеграф истакнува дека Путин неизмерно му верува и дека тој му е бескрајно лојален. Го нарекуваат и „господар на лажни референдуми“.
Киријенко беше најмладиот руски премиер. На оваа функција беше поставен од Борис Елцин во 1998 година, кога имаше 35 години. Беше прилично изненадување, па руските медиуми го нарекоа премиер на „Киндер изненадувања“.
Телеграф пишува дека Киријенко е технократ и следбеник на филозофот-основач на Московскиот методолошки круг, кој верува дека луѓето и општеството можат да се програмираат. Од почетокот на руската инвазија на Украина, Киријенко фигурира како неформален пратеник на Путин за окупираните региони. Од друга страна, многумина веруваат дека неговата моќ зависи исклучиво од Путин и дека тој нема своја база за поддршка, па ако Путин падне и тој ќе падне со него.
