Нема ништо подобро од голем, сочен стек со зеленчук или компир и совршено зачинета салата. Од друга страна, сите велат дека црвеното месо не е толку здраво во споредба со алтернативите. Затоа сме во дилема дали и колку често е пожелно да се консумира. Добрата вест е дека во умерени количини, парче стек не е нездраво за повеќето луѓе. Сепак, има луѓе кои треба да го избегнуваат поради здравствени причини.
Телото на повеќето луѓе го разградува стекот и ги користи неговите компоненти за градење мускули и создавање крв, објаснува д-р Мајк Бол, директор за медицинско образование во Ро. „За жал, тоа не важи за сите луѓе“, вели тој и додава: „Има негативни ефекти од уживањето во оваа храна. Стекот е богат со заситени масти, а редовното консумирање црвено месо е поврзано со висок холестерол, срцеви заболувања и рак, особено рак на дебелото црево“.
Кои луѓе треба да избегнуваат стек?
Оние кои имаат здравствени проблеми поврзани со цревата
Иако повеќето намирници се добри за консумирање во умерени количини, треба да бидете внимателни со стекот, особено ако имате чувствителен стомак. Тоа е затоа што „гастроинтестиналните проблеми го отежнуваат варењето на црвеното месо“, вели д-р Бол, според EatThis.
На големи количини на протеинска и мрсна храна, како што се стек и црвено месо, им треба многу подолго за да го напуштат дигестивниот тракт. Првиот знак на овој проблем е интензивна надуеност и непријатност, што е резултат на вишокот токсини кои се акумулираат во дигестивниот тракт.
Сите кои се алергични на црвено месо
„Единствените луѓе кои треба целосно да го избегнуваат стекот се оние кои имаат краткотрајна реакција на него, како што се оние кои се алергични“, објаснува д-р Бол. Другите луѓе од ризичните групи веројатно нема да имаат негативни реакции ако повремено јадат стек, но тоа навистина не е случај ако сте алергични.
Синдромот Алфа-гал, откриен дури во последните години, се дефинира како алергија на производи направени од цицачи, особено парчиња црвено месо, објави клиниката Мајо. Иако оваа алергија е доста ретка, доколку ја имате, нејзините симптоми ќе се појават за неколку минути откако ќе изедете залак стек.
Симптомите на алергија вклучуваат коприва, чешање и/или егзема, течење на носот, главоболка, отежнато дишење, болки во стомакот, дијареа, гадење или повраќање и отекување на делови од телото како што се усните, лицето, јазикот и грлото.
Луѓе кои имаат дијабетес
Стекот и повеќето црвено месо имаат многу повеќе заситени масти од алтернативите, објаснува д-р Седрина Калдер, која може да акумулира повеќе LDL холестерол (лош холестерол) во крвта и да го зголеми крвниот притисок. „Луѓето со дијабетес имаат зголемен ризик од срцеви заболувања, така што избегнувањето на стек би спречило дополнително зголемување на овој ризик“, сугерира таа.
Американското здружение за дијабетес препорачува вкупниот внес на масти за лице со дијабетес да не надминува 20 грама, а стек од 200 грама во просек содржи околу 19 грама заситени масти. Имајќи предвид дека веројатноста за висок крвен притисок е двојно зголемена за лице со дијабетес во споредба со некој без, бифтекот треба да се најде на вашето мени што е можно поретко доколку страдате од оваа болест.
Луѓе со семејна историја на рак на дебелото црево
Честото консумирање стек може да предизвика бројни здравствени проблеми, но најмногу кај луѓето со одредени генетски предиспозиции. Јадењето стек и друго слично црвено месо „е поврзано со неколку различни видови на рак, особено рак на дебелото црево“, вели д-р Калдер, додавајќи: „Ако некој во вашето семејство имал рак на дебелото црево, можеби би било мудро да избегнете стек“.
Според Harvard Health, луѓето кои јадат 140 грама или повеќе стек (или друго црвено месо) на дневна основа го зголемуваат ризикот од развој на рак на дебелото црево за 28 проценти. Имајќи го тоа на ум, посното месо како пилешкото и рибата се смета за поздрава алтернатива на црвеното месо, пренесува City Magazine.
