Во Главниот пребројувачки центар во Сараево почна пребројувањето на гласачките ливчиња за претседател на Република Српска.Претседателот на Централната изборна комисија на Босна и Херцеговина (ЦИК) Суад Арнаутовиќ ги отфрли обвинувањата дека Државната изборна комисија донела незаконска одлука за пребројување на гласовите за тоа изборно ниво.
„Тука нема политика и незаконски дејствија. Ние ги следиме изборите со закон. Имаме индиции и сознанија за палење гласачки ливчиња, означување на гласачки ливчиња, неправилно пакување на избирачкиот материјал, неискористени ливчиња и затоа овде ќе направиме јавно пребројување“, рече Арнаутовиќ.
Директорот на Главниот центар за броење, Горан Мишковиќ изјави дека прво ќе се пребројат избирачките единици Бањалука и Бјелина, а потоа ќе се пребројат гласовите од Добој.
Тој изјави дека ќе работат во три смени.
ЦИК претходно ги покани Јавните радиодифузни сервиси во БиХ – БХРТ, Радио-телевизијата на Федерацијата БиХ (ФТВ) и Радио-телевизијата на РС (РТРС), како и другите заинтересирани комерцијални медиуми директно да го пренесуваат пребројувањето на гласачките ливчиња. .
Редакцијата на РТРС одби да го стори тоа, наведувајќи дека ги немаат потребните технички услови за целосно следење на процесот на броење.
