Додека за еден час светот го очекува говорот на Путин во салата свети Ѓорѓи во Кремљ и потпишувањето на анексијата на украинските региони, водачот на ДНР Денис Пушилин изјави дека руското упориште Лиман на северот од регионот е „полуопколено“ од украинската армија и дека вестите од фронтот се „алармантни“, пренесува Б92.
Во пораката објавена на Телеграм, Пушилин рече дека селата Јампил и Дробишево кај Лиман „повеќе не се целосно под наша контрола“.
Истовремено, таканаречената Народна милиција на Доњецката Народна Република (ДНР) утринава соопшти дека во Доњецк пристигнале првите руски војници од делумната мобилизација.
„Првите војници повикани на воена служба во делумната мобилизација објавена во Русија пристигнаа во зоната на специјални воени операции на територијата на ДНР. Сега тие минуваат низ интензивна борбена обука на полигоните за обука што го зема предвид искуството на битките во последните месеци Жителите на Доњецката Народна Република со ентузијазам го дочекаа пристигнувањето дополнителни сили и му се заблагодарија на претседателот на Руската Федерација за одлуката“, пишува „Народна милиција“ на апликацијата Телеграм.
Русија, Сирија и Северна Кореја се единствените членки на ОН кои ја признаваат Доњецката Народна Република како легитимна влада.
Подоцна денеска се очекува Русија да го објави припојувањето на Доњецк, територија што не ја контролира целосно, кон Руската Федерација, како и на три други украински региони – Луганск, Керсон и Запорожје.
