Европската комисија преговара со доверливи добавувачи на гас за намалување на цените на гасот што се испорачува преку гасоводи, а доколку тоа не вроди со плод, тогаш можно е ограничување на цената на гасот, изјави Кадри Симсон, комесар на Комисијата за енергетика.
„Преговараме со нашите доверливи добавувачи преку гасоводот. Ако тоа не вроди со плод, тогаш можно е ограничување на цените“, изјави комесарот Симсон пред вонредниот состанок на министрите за енергетика на земјите-членки на ЕУ, што ќе се соберат во петок во Брисел.
Се очекува министрите да постигнат договор за предлогот за намалување на побарувачката на електрична енергија со цел намалување на цената на струјата за потрошувачите и мерки за распределба на вишокот приходи на енергетскиот сектор во корист на крајните потрошувачи.
Комисијата предлага обврска за намалување на потрошувачката на електрична енергија за најмалку 5 отсто во одредени шпицови. Земјите-членки ќе мора да ги идентификуваат 10 проценти од часовите со највисока очекувана цена и да ја намалат побарувачката во тие часови на шпиц.
Како друга мерка, Комисијата предложи да се определи горната граница на приходи за „инфрамаргиналните“ производители на електрична енергија, односно електрани со помали трошоци кои не користат гас за производство на електрична енергија, туку обновливи извори на енергија, нуклеарна енергија и лигнит.
Како трета мерка, Комисијата предлага привремен солидарен придонес за вишокот профит остварен во дејности во секторите нафта, гас, јаглен и рафинерии кои не се опфатени со плафонот за инфрамаргинален приход.
Група земји-членки на ЕУ, меѓу кои и Хрватска, побараа од Европската комисија да подготви предлог за претстојниот вонреден состанок на министрите за енергетика за поставување на горна граница на големопродажната цена на гасот. Писмото со вакво барање досега е потпишано од 15 земји-членки, кои би можеле да обезбедат квалификувано мнозинство и да го усвојат предлогот. Но, за предлогот да се најде на дневен ред на Советот, мора да биде предложен од Комисијата, што не беше сторено.
Наместо тоа, комисијата подготви документ кој ќе послужи како основа за расправа на министерскиот состанок.
Во документот се вели дека можностите на Русија да ја пренасочи продажбата на својот природен гас на други пазари се „занемарливи“ доколку се одлучи да го стори тоа како одмазда во случај ЕУ да наметне ограничување на цената на рускиот гас.
„Во случај на целосен прекин на испораките на руски гас, ЕУ како целина би можела да се справи со просечна температура зима благодарение на складираните залихи и планот за намалување на побарувачката усвоен во јули“, се вели во документот.
За оние земји-членки кои во моментов се зависни од рускиот гас, треба да се најде решение во целосна солидарност со другите земји-членки, се додава во документот.
Комесарот Симсон вели дека Русија не е доверлив партнер, туку причина за проблемот.
„Силно верувам дека треба да има ограничување на цената на рускиот гас на ниво што сепак би било привлечно за нив да продолжат да извезуваат во Европа“, вели Симсон.
Таа додаде дека е подготвена да предложи ограничување на цената на гасот наменет за производство на струја.
„Ограничувањето мора да биде на такво ниво да не доведе до зголемување на потрошувачката на гас. Затоа што ако се троши повеќе гас и се купува на тесниот светски пазар, тоа ќе поттикне понатамошен раст на цените“, вели Симсон.
