Шведската крајбрежна стража соопшти дека открила четврто истекување на гасоводите „Северен тек“, кои беа оштетени претходно оваа недела во наводен чин на саботажа, јавува Ројтерс. Првично, се веруваше дека цевководите на дното на Балтичкото Море се оштетени на три локации, при што беа погодени двете линии – Северен тек 1 и Северен тек 2.
Но, портпаролката на шведската крајбрежна стража Џени Ларсон во четвртокот за весникот „Свенска дагбладет“ изјави дека всушност имало четири истекувања во подводната инфраструктура.
– Две од четирите протекувања се во ексклузивната економска зона на Шведска – рече Ларсон, додавајќи дека другите двајца се во данската ексклузивна зона.
Данските власти во понеделникот открија протекување на гасоводите, изградени за испорака на руски природен гас во ЕУ, откако операторот пријави губење на притисокот и на Северен тек 1 и на Северен тек 2.
Данските и шведските власти подоцна соопштија дека имало серија подморски експлозии во близина на островот Борнхолм. Ова доведе до тоа Русија, САД и Шведска да сугерираат дека протекувањето можеби е резултат на намерен чин.
