Активистот на ЛГБТ+ заедницата, Горан Милетиќ, изјави дека организаторите на „Европрајд“ постојано се во контакт со Владата на Србија и дека никогаш не го прекинале, но дека денеска нема средба со надлежните.
Милетиќ за Н1 објасни дека денеска нема вонреден состанок во Владата и дека имаат постојана комуникација со Владата за Прајд.
Тој вчера најави дека „Европрајд 2022“ сигурно ќе се одржи во Белград и дека се очекуваат околу 15.000 учесници.
Милетиќ рече дека ќе се одржат сите веќе планирани настани за периодот од 12 до 18 септември.
„Од настаните на отворен простор, прошетката ќе се одржи на 17 септември, а два концерта на Калемегдан на 16 и 17 септември“, рече Милетиќ, кој е еден од организаторите на Европрајд.
Тој посочи и дека во моментов нема забрана од државата, но дека е можно надлежните да донесат одлука за забрана на прошетката и попречување на одржување концерти.
