Руската банка ВТБ во четвртокот им порача на деловните клиенти да избегнуваат трансакции со долари и евра, а Сбербанк соопшти дека е подготвена за сите сценарија, алудирајќи на заканата од санкции по рускиот напад врз Украина.
Во писмото до клиентите, ВТБ наведува дека засега се достапни сите услуги и дека се подготвени за нормално продолжување на работата.Филијалите, банкоматите и интернет-услугите функционираат нормално, соопшти ВТБ, нагласувајќи дека деловните клиенти треба да избегнуваат трансакции во долари и евра со цел „да се минимизираат ризиците, со оглед на моменталната ситуација“, пренесува Интерфакс.
Најголемата руска банка Сбербанк исто така соопшти дека е подготвена за можни проблеми.
-„Подготвени сме за каков било развој на настаните, развивме сценарија за да се осигураме дека парите, средствата и интересите на нашите клиенти се заштитени и дека нашите функции се целосно оперативни“, велат од Сбербанк. Висок претставник на американската администрација изјави во вторникот дека Сбербанк и ВТБ ќе се соочат со американски санкции доколку Москва продолжи да ја нападне Украина. Ниту една руска финансиска институција не е безбедна, предупреди тој.
Акциите на двете банки, котирани на Московската берза, сепак, беа полоши од пазарот во целина. Акциите на Сбербанк паднаа за 49,4 отсто, на најниско ниво во последните шест години, а акциите на ВТБ за 41,3 отсто.Интернет банката Тинкоф, чии акции на лондонската берза паднаа за 45,2 отсто, соопшти дека нејзините системи работат непречено.
-„Тинкоф има доволна ликвидност“, велат од банката, која не е државна, но се наоѓа на списокот од 13 системски важни банки во Русија.
-„Гледаме зголемена побарувачка за повлекување готовина и ги надополнуваме банкоматите по засилен распоред“, додаваат тие.
