Поранешна сопственичка на погребна куќа во Колорадо во вторникот се изјасни за виновна по федералните обвиненија за измама на роднините на мртвите, за тајно сечкање трупови и продажба на делови од тела без согласност на ужалените роднини.
Меган Хес, која ја водела погребната куќа наречена Sunset Mesa и бизнис со делови од тело наречен „Donor Services“ од истата зграда – во вторникот пред федералниот суд призна дека измамила најмалку десетина семејства кои платиле за кремирање на нивните починати најблиски. Обвинителството бара затворска казна од 12 до 15 години.
Наместо да ги кремира телата, таа од починатите зела глави, р’бет, раце и нозе, а потоа ги продавала, според судските записи. Нејзиниот бранител побара полесна казна од две години.
Во 2009 година, Хес и нејзината мајка, Ширли Кох, основаа непрофитна дарителска организација наречена Sunset Mesa Funeral Foundation, „услуга за посредување на телото“ која работи надвор од погребно претпријатие и продава делови од телото на трети лица – главно за хируршка обука и други образовни цели.
Двојката на клиентите им наплатувала 1.000 долари или повеќе за кремирање што никогаш не се случило. За да го максимизира профитот, Хес ги таргетирала сиромашните и ранливите семејства. Исто така, понудила бесплатни кремации во замена за донација на тело или органи.
Многу семејства добија пепел помешан со остатоци од различни тела, соопштија обвинителите. Еден клиент добил бетонска смеса наместо посмртните останки на саканата личност.
Хес фалсификувала десетици формулари за согласност од донатори, откриле федералните истражители. Поранешна вработена ја обвини дека заработила 40.000 долари со вадење и продавање на златните заби на некои од починатите, според судските документи.
– Средба со Хоспис (Центар за палијативна нега и палијативна медицина) … отворање врати за донаторите. Имаат четири или пет смртни случаи на ден. Подгответе се!!! … Што е со договор за целосно балсамирани боцки … 950 долари? – напишала Хес на потенцијален купувач на делови од телото во 2014 година.
Продажбата на органи како што се срца, бубрези и тетиви за трансплантација во САД е нелегална.
