Првиот тенисер во светот Данил Медведев нема да учествува на Вимблдон, но будно ќе ги следи случувањата од третиот Грен слем турнир во сезоната.
Медведев смета дека Новак Ѓоковиќ е фаворит на лондонската трева, а работата на Србинот сигурно ќе биде нешто полесна бидејќи на ждрепката нема да има руски (и белоруски) претставници на кои организаторите им забранија да дојдат во Велика Британија.
„Ѓоковиќ секогаш е фаворит. Тој ги освои последните три Вимблдони. Тој е многу добар во игра на трева. Секако, Надал може да го освои апсолутно секој турнир на кој настапува. Мора да се истакне и Беретини, кој во последно време игра на високо ниво“, изјави Медведев за Диарио де Мајорка.
Русинот во четвртокот беше поразен од Роберт Баутиста Агут со 6:3, 6:2 во четвртфиналето на турнирот од серијата 250 во Мајорка, а по кратка пауза се очекува да ја продолжи сезоната на тврда подлога.
Медведев е пријавен за турнирот во Лос Кабос од 1 до 6 август.
Ждрепката за најпрестижниот турнир во светот е денеска во 11 часот, а сите натпревари од Вимблдон ќе можете да ги следите на каналите на Sport Club.
