Најмалку десет лица загинаа, а 20 се водат како исчезнати како последица на ураганот Агата, кој ја погоди мексиканската држава Оахака.
Гувернерот на Оахака Алехандро Мурат изјави дека реките се излеале како последица на урагани и лизгање на земјиштето.
„За жал, десет лица загинаа, а 20 се водат за исчезнати“, рече Мурат.
Цивилната заштита на Оахака соопшти дека е предизвикана голема материјална штета особено во регионот Сиера Сур откако ураганот поминал.
Тие рекоа дека бројот на загинати може да се зголеми.
Ураганот, кој се движеше со брзина од 140 до 170 километри на час од брегот на Оахака, создаде бранови високи од шест до осум метри.
Националната координација за цивилна заштита (CNPC) соопшти дека повеќе од 70.000 луѓе во државите Оахака и Веракруз биле погодени од ураганот.
Мексиканската влада објави дека портокалов аларм е на сила во 294 градови во сојузните држави Оахака и Чиапас на југот на земјата.
