Чешкиот претседател Милош Земан ја обвини ЦИА за фијаско поради најавите за руски напад врз Украина оваа недела и повтори дека верува оти нема да има војна освен можеби ограничен конфликт во сепаратистичките области на Украина.
– Русите не се луди да се вклучат во операција која ќе им нанесе повеќе штета отколку корист. Кога станува збор за американските тајни служби, ова им е третото фијаско. Првото беше војната во Ирак каде не беше пронајдено оружје за масовно уништување. Второто во Авганистан кога тврдеа дека талибанците никогаш нема да го освојат Кабул. А третото е сега, изјави Земан во интервју што го објави чешкиот весник „Млада Фронта Днес“.
Чешкиот претседател изјави дека тој не верува во тоа дека тајните служби на САД ја спречиле инвазијата.
– Мислам дека тоа е обид да се скрие срамот. Веста за инвазијата дојде од американски извори пред пет дена. И како што можете да видите, тоа не се случи. Во секој случај, тоа беше извештај на ЦИА. И не се прашувам какви извори на информации има. Само врз основа на споменатите три случаи се сомневам во квалитетот на тие извори – рече Земан.
Претседателот на Чешка, сепак, не ја исклучува можноста дека во Украина ќе има војна.
– Не можам да исклучам некој локален конфликт на границите на Доњецк или Луганск. Но, тоа е нешто сосема различно од руска агресија врз Украина. Кога ќе ме прашате зошто Западот го прави ова, а генералниот секретар на НАТО Јенс Столтенберг вели дека Русите се подготвени и војната може да започне во секој момент, против тоа зборува повлекувањето на руските единици – рече Земан.
Според него, распоредувањето на руски трупи на границата со Украина е само воена вежба која русите ја спроведуваат на своја територија.
