Мицкоски се обрати во Атлантскиот совет во Вашингтон

Премиерот Христијан Мицкоски имаше обраќање во Атлантскиот совет во Вашингтон каде што говореше за иднината на трансатлантските односи и Западен Балкан, осврнувајќи се на односите со Грција, посебно со Бугарија и нашето членство во Европската унија.

„На разговорот во Атлантскиот совет истакнав дека, и покрај значајните отстапки за напредок во евроатлантската интеграција, Македонија останува посветена на заштитата на своите национални интереси и идентитет. Посебен акцент ставив на улогата на Европскиот суд за човекови права во Стразбур како гарант на човековите права и владеењето на правото, нагласувајќи дека нашата држава ги почитува сите негови пресуди“, напиша премиерот на Фејсбук споделувајќи фотографии.

Претседателот на македонската Влада, кој во САД е придружуван од шефот на дипломатијата Тимчо Муцунски, синоќа имаше средба со Александар Касаноф, заменик помошник секретар за Западен Балкан во Бирото за европски и евроазиски прашања на Стејт департментот, на која стана збор состојбата во државата, за европските интеграции и препреките со кои се соочува земјава на тој план, како и за реформската посветеност на Владата и фокусот на клучните области.

- Advertisement -

Станало збор и за актуелните случувања во регионот на Западен Балкан, со посебен акцент на регионалната безбедност, економската соработка, доброто владеење и демократијата.

На средбата заеднички е потврден интересот за одржување континуитет во политичкиот дијалог и зацврстување на билатералните односи помеѓу двете земји, преку засилена комуникација и институционална соработка, продолжување на активностите во рамки на Стратешкиот дијалог, како и преку продлабочена соработка и партнерство во рамки на НАТО алијансата.

Дипломатската офанзива на Мицкоски во рамките на посетата на Вашингтон ќе продолжи со обраќање на годишната Конференција за политичкo дејствување на конзервативците.

На тридневната конференција, која е најголем ваков собир за конзервативците во САД збор ќе земат и Ричард Гренел, претставник на американскиот претседател Доналд Трамп за специјални мисии и словачкиот премиер Роберт Фицо, унгарскиот премиер Виктор Орбан, аргентинскиот претседател Хавиер Милеи и италијанската премиерка Џорџа Мелони.