Сѐ е подготвено за утрешниот старт на мерката „Новогодишна кошничка“ која треба на граѓаните да им донесе производи со пониски цени од минимум 10%, уверува заменикот министер за економија и труд, Марјан Ристески. Бројката на производи кои влегуваат во „Новогодишната кошничка“ се очекува да достигне дури преку 1.000.
– Со почетокот на мерката „Новогодишна кошничка“ очекуваме бројот на производи да достигне преку 1.000. Оваа општествено одговорна акција произлезе од компаниите и маркетите, а ние како Министерство и Влада ја поддржавме. Опфатени се преку 80 компании, изјави Ристески денеска во Прилеп – вели Ристески.
Тој ги повика граѓаните и синдикатите и тие со инспекторатот да вршат своевиден мониторинг на цените на производите и да ја пријават секоја неправилност.
– Ги повикувам граѓаните, синдикатите заедно со пазарниот инспекторат кој ќе биде постојано на терен, да следат и да се уверат дека производите во кошничката се намалени најмалку 10% од најниската цена од претходниот месец, пред да започне акцијата. Така што, не верувам дека има некои изигрувања зашто компаниите и маркетите ја понудија оваа акција и не верувам дека самите ќе ја изиграат – додава тој.
Во новогодината кошничка се опфатени месо и месни производи, млеко и млечни производи, алкохолни и безалкохолни пијалаци, риба, пекарски производи, тестенини, кондиторски производи, овошје, зеленчук. Овие производи, опфатени со мерката, ќе се продаваат на преку 300 пунктови во сите градови во земјава.
– Очекуваме граѓаните да ги поминат овие новогодишни празници со пониски цени и да заштедат во домашниот буџет овие новогодишни празници – вели заменик министерот.
Ристески објаснува дека од кошничката се изоставени маслото, шеќерот, кафето и какаото за да не им се направеле големи штети на компаниите.
– Овие производи не ги ставивме во мерката зашто не сакавме да им наштетиме на компаниите кои зависат од домашниот пазар, но и од цените на суровините на светските берзи кои во моментов се многу зголемени. Но, има и одговорни компании кои и на овие изземени производи им дадоа одредени попусти – нагласува Ристески.
Мерката ќе трае од 15 декември до 15 јануари.
