Австрија има намера да го повлече ветото за влез на Романија и Бугарија во Шенген зоната, објави во понеделникот австрискиот министер за внатрешни работи Герхард Карнер. Тој објасни дека има намалување на илегалните преминувања на австриската граница од правец на ограничени земји, јавуваат странските агенции.
Герхард Карнер најави дека на состанокот на министрите за внатрешни работи на ЕУ во четврток ќе гласа за влез на Романија и Бугарија во Шенген зоната. Како што појасни, пред австриското вето биле евидентирани 70.000 илегални преминувања на границите од правец на споменатите земји, но само 4.000 годинава.
„Без ветото немаше да дојде до ова големо намалување на илегалните гранични премини“, додаде тој.
Бугарија и Романија веќе неколку години чекаат зелено светло за влез во Шенген зоната. Досега на ова се спротивстави особено Австрија, велејќи дека тоа ќе ја зголеми илегалната миграција.
Австрискиот министер за внатрешни работи уште во ноември ги пофали досегашните напори за заштита на надворешните граници на двете земји и посочи дека Австрија може да престане да се противи на нивното влегување во Шенген.
По долги дискусии, двете земји се приклучија на таканаречениот Шенген договор, што значеше дека ја укинаа внатрешната контрола на аеродромите и пристаништата. Отстранувањето на австриското вето би значело дека земјите би можеле да влезат во Шенген зоната веќе следната година.
