Андриј Коваленко, шеф на Центарот за борба против дезинформации при Советот за национална безбедност и одбрана на Украина, ги отфрли тврдењата дека на украинската војска ѝ било наредено да ја држи територијата во руската област Курск до инаугурацијата на Доналд Трамп на 20 јануари и мирорните преговори, јави Киев Пост.
Коваленко реагираше на написот на Би-Би-Си од вторникот во кој медиумот тврди дека преку Телеграм контактирал со украински војници кои наводно ја потврдиле веста.
– Вооружените сили на Украина не добија никаква наредба да го задржат регионот Курск до инаугурацијата на Трамп сè до идната „размена“ – рече Коваленко.
Тој ги означи извештаите што кружат во медиумите како лажни, истакнувајќи дека украинските сили во регионот Курск извршуваат борбени мисии кои се во согласност со пошироките стратешки цели на линијата на фронтот.
– Овие мисии влијаат на ситуацијата на неколку други фронтови, вклучително и позиционирањето на руските сили – истакна Коваленко, додавајќи дека таквите наредби „во принцип не можат да се издаваат на армијата“.
Во статијата на Би-Би-Си неименувани украински војници се жалат на ужасните временски услови и хроничниот недостаток на сон, предизвикани од постојаното руско бомбардирање, кое вклучува употреба на застрашувачки лизгачки бомби тешки 3.000 килограми.
Би-Би-Си известува дека речиси четири месеци откако украинските сили започнаа молскавична офанзива во рускиот регион Курск, пораките од војниците кои се борат таму даваат мрачна слика за битката што не ја разбираат и стравуваат дека би можеле да ја изгубат. Сепак, Андриј Коваленко ги негираше сите овие наводи.
