Ученикот А.И. (16), кој денеска беше претепан пред Хемиското училиште во Лесковац, им подлегнал на повредите, потврдија во лесковачката општа болница, јави дописникот на МИА од Белград.
– Донесен е без свест, со широки зеници, бледа кожа и слузокожа, без пулс и со немерлив притисок – изјави директорот на Општата болница Лесковац, Небојша Димитријевиќ, додавајќи дека реанимацијата била веднаш започната, но за жал неуспешно.
Тој рече дека точната причина за смртта ќе ја утврди обдукцијата.
Како што објавија српските медиуми, А.И. бил ученик во трета година во Текстилното училиште. Враќајќи се дома, бил нападнат со метални прачки од две млади момчиња на скутер кои избегале по тепањето.
Поради истрагата која е во тек, полицијата сѐ уште нема излезено со детали.
Според директорот на Центарот за социјална работа, Предраг Момчиловиќ, 16-годишното момче А.И. 10 години било во згрижувачко семејство во Лесковац, а инаку е од околината на Лесковац.
