Трамп ги поддржува повиците за „национален план за вонредни состојби, пренесе „Вашингтон Пост“. Трамп одговараше на објавата на социјалните мрежи на Том Фитон од Judicial Watch, во која Фитон рече дека постојат наводи дека администрацијата на новоизбраниот американски претседател планира таква декларација и користи „воени ресурси“ за да ги депортира мигрантите.
„Тоа е вистина“, напиша Трамп.
Трамп претходно изјави дека имиграциската политика на демократите ги претворила САД во „депонија за целиот свет“. Веста дека тој го потврдил сценариото со вонредна состојба ја пренесе и Њузвик.
Во предизборната кампања тој вети дека ќе започне со масовни депортации веднаш штом ќе ја преземе функцијата.
Трамп треба да биде инаугуриран во Белата куќа на 20 јануари. Тој веќе назначи неколку поборници за поостри мерки за имиграција на клучните позиции во владата. Гувернерката на Јужна Дакота, Кристи Ноем, беше избрана да служи како секретар за внатрешна безбедност.
Поранешниот вршител на должноста директор на американската Служба за имиграција и царина, Том Хоман, е прогласен за „цар на границите“.
Хоман претходно зборуваше за својата визија за масовни депортации, велејќи дека тие прво ќе се фокусираат на протерување на криминалците и луѓето кои претставуваат закана за националната безбедност. Тој не ја исклучи можноста за депортирање на цели семејства.
За време на кампањата, Трамп вети дека ќе ја мобилизира Националната гарда за да помогне во напорите за депортација.
Експертите изјавија за Еј-Би-Си Њуз дека таквиот потег ќе означи фундаментална промена во улогата на војската, која обично не се занимава со домашните прашања за спроведување на законот.
