Украинскиот претседател, Володимир Зеленски, денеска изјави дека Русија сака само продолжување на војната, па затоа на Украина ѝ треба оружје за заштита од рускиот терор и за зајакнување на дипломатските позиции.
„Русија само сака да ја продолжи војната, а секој нејзин удар ги побива сите нејзини изјави за дипломатијата. На Украина ѝ требаат оружје за заштита од рускиот терор и посилна поддршка од светот за да стане дипломатијата реална и силна. Без принципиелни одлуки и силна поддршка, Русија нема да има мотив да бара мир во Украина, туку само ќе бара нови цели“, напиша Зеленски на каналот Телеграм.
Неговата изјава е во контекст на рускиот ракетен напад врз Криви Рог, во Днепропетровскиот регион, во кој беа повредени осум лица, меѓу кои и две деца, и беше уништен влез на петкатница.
Зеленски истакна дека Руската Федерација „го врши истиот терор секој ден и ноќ. Освен тоа што сѐ поголем број цивилни објекти стануваат мети“.
Претседателот пријави седум жртви како резултат на ракетниот напад на Криви Рог, меѓу кои и две деца.
„Во тек е итна спасувачка операција, се прават максимални напори да се спасат животи. Можно е да има луѓе под урнатините“, рече Зеленски.
Канцеларијата на украинскиот јавен обвинител веќе пријави осум жртви, меѓу кои и 10-годишно девојче и 11-годишно момче.
Поведена е предкривична истрага за прекршување на законите и обичаите на војната.
