Белорускиот претседател Александар Лукашенко денеска изјави дека се надева оти со победата на републиканскиот кандидат Доналд Трамп на претседателските избори во САД нешто ќе се промени бидејќи Трамп „се бори за иднината на своите деца“.
Лукашенко оцени дека кога на власт се луѓе без искуство, тоа е една работа, а „кога луѓето немаат деца, тоа е катастрофа“, пренесува РИА новости.
– Трамп има големо семејство, деца. Трамп ја има нашата Меланија, која цврсто го држи в раце. Тоа што има семејство и деца е голема работа. Тој не размислува само за својата иднина, туку и за иднината на своите деца – рече Лукашенко.
Во вторникот Трамп стана првиот американски претседател што се вратил во Белата куќа по четиригодишна пауза во историјата на САД.
Од друга страна, противничката на Трамп Камала Харис беше критикувана од републиканците за време на изборната кампања бидејќи нема биолошки деца.
Одговарајќи на овие наводи, таа рече дека „ова веќе не се педесеттите години од минатиот век“.
Таа исто така ги нарече лоши и злонамерни коментарите на републиканскиот кандидат за потпретседател Џеј ди Венс за „дамите без деца што чуваат мачки“.
