Спасувачките екипи во Шпанија ја продолжуваат потрагата по исчезнатите лица, кои претходните денови придружени со силно невреме ги парализираа источните делови на оваа земја, а според официјалните информации бројот на жртвите се искачи на повеќе од 150 лица.
Официјалниот биланс на загинати вчера се зголеми од 95 на 158, но се верува дека ова не е конечниот број бидејќи итните служби продолжуваат да трагаат по исчезнатите.
Денеска и официјално е вториот ден од тридневната национална жалост, па насекаде може да се видат шпански знамиња како се висат на половина копје.
Шпанскиот премиер Педро Санчез апелираше до граѓаните од погодените делови на земјата да не ги напуштаат своите домови бидејќи уништувањето не е завршено, а Валенсија ја прогласи за најтешко погодена област и ја прогласи за „зона на катастрофа“.
Силниот дожд кој паѓаше без престан ги парализираше и ги поплави градовите на истокот од земјава.
Најтешка е ситуацијата во Малага и Валенсија, каде што многу луѓе се најдоа заробени во своите домови и автомобили опкружени со брзи поплави и порои.
Сѐ уште е во сила жолтото метео предупредување во најпогодените подрачја од овие поплави, каде се очекуваат дополнителни врнежи.
Како што растат шокот и неверувањето на Пиринеите, така расте гневот кај шпанските граѓани поради начинот на кој властите реагираа на кризата и што доцнеа со испраќањето и одговорот на предупредувањата за претстојните поплави.
Многу преживеани поминуваат долги растојанија низ тиња и кал, каде што се шири непријатна миризба, се со цел да најдат чиста вода и храна. Нивните автомобили беа заглавени и уништени во калта и тињата, додека невремето парализираше бројни патишта и го оневозможи движењето на населението. Патиштата останаа непроодни.
Околу 150.000 луѓе во областа Валенсија останаа без струја во средата, но половина од областа беше обновена вчера. Голем број луѓе сѐ уште немаат вода за пиење и сега бараат флаширана вода за пиење.
Областа останува делумно изолирана, бидејќи бројни патишта се отсечени, железничката линија е во прекин, вклучувајќи ја и брзата линија што оди кон Мадрид. Официјалните лица велат дека ќе им требаат две до три недели да го исчистат сето тоа.
И додека службите за итни случаи се борат да ги пронајдат исчезнатите, преживеаното население се обидува да собере основни потреби и да работи на расчистување на настанатиот хаос.
Голем број волонтери се вклучија во помош на локалното население во расчистување на уништените и заглавени возила, отстранување на ѓубрето и калта предизвикана од поројните дождови за време на поплавите.
Претседателот на регионот Валенсија, Карлос Мазон, во четвртокот побара од шпанските вооружени сили да обезбедат основни потреби за локалното население. Мадрид одговори со испраќање војници, испраќајќи повеќе од 500 шпански војници, повеќе полициски сили и членови на Цивилната гарда, објави британскиот весник Индипендент.
Она што сега најмногу загрижува е што според метеоролозите можни се нови врнежи кои повторно ќе ги погодат и онака опустошените подрачја.
Воздушниот систем „Дана“ кој донесе поплави на почетокот на неделата сега почна да слабее, но дополнителни врнежи се предвидуваат за петок и сабота.
Најобилни врнежи вечерва ќе има на истокот и југот на Шпанија. Предупредувањата за дожд се на сила на северот на Валенсија, особено околу Тарагона и Кастиља, Менорка и Мајорка. Потоа, во југозападна Андалузија околу Хуелва и Кондад.
Во овие погодени подрачја во следните 12 часа се очекува да наврнат и до 100 мм дожд, на веќе заситена почва, што може да предизвика дополнителни поплави.
Дождот треба да стивне во текот на саботата, а од недела во Шпанија се очекува потопол ден, јави Би-Би-Си.
