Израел уби најмалку тројца новинари и рани неколку други во нападот во петокот рано наутро додека тие спиеле во куќи за гости што ги користеле новинарите во Хасбаја, јужен Либан, објавија либанското Министерство за здравство и локалните медиуми. Меѓу загинатите се снимателот Гасан Наџар и инженерот Мохамед Реда од проиранскиот медиум Ал-Мајадин и камерманот Висам Касем, вработен во Ал-Манар на Хезболах, потврдија овие медиуми во одделни изјави.
Нападот го одбележа најсмртоносниот ден за медиумските работници во една година конфликт меѓу израелската армија и либанската милиција Хезболах. Израел, кој главно негираше дека намерно ги таргетирал новинарите, допрва треба да даде официјален коментар за нападот. Досега, во израелските напади врз Либан за време на овој конфликт загинаа пет новинари, меѓу кои и фоторепортерот на Ројтерс, Исам Абдалах.
Градот Хасбаја, каде што живеат муслимани и христијани, беше цел на напади во последните недели, но ова е првпат напад да се изврши директно во самиот град. Инцидентот се случил околу три часот наутро по локално време.
„Ова е воено злосторство“, рече либанскиот министер за информации Зиад Макари. Најмалку 18 новинари од шест медиуми, вклучително и Скај Њуз, Ал Џезира и неколку либански радиодифузери, престојуваа во куќите за гости во Хасбаја.
Новинарот на либанскиот канал Ал-Џадид, Мухамед Фархат, ги опиша за Ројтерс моментите пред нападот: „Слушнавме авион како лета многу ниско – тоа не разбуди – а потоа слушнавме две ракети“. Фархат рече дека неколку бунгалови биле оштетени, додека неговата снимка покажува превртени и оштетени автомобили со ознака „Прес“.
Директорот на Ал-Мајадин, Гасан бин Џидо, на социјалната мрежа Икс изјави дека нападот бил „намерен“. „Ние ја сметаме окупаторската сила (Израел) целосно одговорна за ова воено злосторство, чија цел беше новинарите, вклучително и тимот на Ал-Мајадин“, напиша бин Џидо.
Еден ден претходно, Израел изврши напад врз канцеларија што ја користеше Ал-Мајадин во јужните предградија на Бејрут. Либанското Министерство за здравство соопшти дека во нападот е убиено едно лице, додека пет други, меѓу кои и едно дете, се ранети.
Либанските власти тврдат дека израелската воена кампања досега убила повеќе од 2.500 луѓе, а раселени повеќе од 1,2 милиони луѓе, создавајќи хуманитарна криза, Ројтерс.
