Американскиот државен секретар Антони Блинкен во вторникот пристигна во Тел Авив за да одржи состаноци со израелски официјални претставници додека САД се обидуваат да ги унапредат напорите за изнаоѓање дипломатско решение за ескалацијата на конфликтот на Блискиот Исток.
Ова е 11-та посета на Блинкен на регионот по избувнувањето на војната минатата година, и доаѓа во критично време кога се очекува Израел да возврати на иранскиот ракетен напад, додека преговорите за прекин на огнот во Либан и Газа се заглавени.
Посетата доаѓа во време на затегнати односи меѓу Вашингтон и неговиот најблизок сојузник во регионот. САД неодамна го предупредија Израел дека може да ја прекине испораката на оружје доколку не се подобри хуманитарната ситуација во Газа.
Неодамнешните протекувања од американски разузнавачки кругови за израелските воени планови дополнително ги заострија односите. Сепак, Стејт департментот во понеделникот рече дека не очекува дека протекувањето ќе биде разговарано за време на состаноците на Блинкен.
Портпаролот на Советот за национална безбедност на САД, Џон Кирби, во понеделникот изјави дека Белата куќа не е оптимист во врска со обновувањето на преговорите за прекин на огнот во Газа и Либан.
Тензиите во регионот се на високо ниво, а иранската мисија во Обединетите нации предупреди дека САД ќе бидат „соучесник“ во каква било израелска агресија против Иран, доколку продолжи да му обезбедува напредна воена опрема на Израел, пренесува Си-Ен-Ен.
