Групата од пет главни земји-членки на ЕУ троши 42 милијарди евра годишно за субвенционирање на службени автомобили на фосилни горива, според истражувањето нарачано од здружението за заштита на животната средина Транспорт и животна средина (T&E).
Италија е на прво место од петчлената групација со 16 милијарди евра, а на второ е Германија со 13,7 милијарди евра, покажува истражувањето на консултантската компанија Environmental Resources Management (ERM).
Франција и Полска издвојуваат 6,5 милијарди и 6,1 милијарди евра годишно.
На дното на „големата“ листа е Шпанија со „само“ 100 милиони евра субвенции.
Приближно 15 милијарди евра во четири земји одат за субвенционирање на спортски комунални возила (SUV). Возачите на службени автомобили просечно добиваат даночен додаток од 6.800 евра годишно, а сумата може да достигне 21.600 евра за поголемите модели кои повеќе ја загадуваат животната средина.
Во такви услови, продажбата на електрични возила на компании заостанува далеку зад просекот на пазарот, покажа истражувањето.
Најголема дупка е забележана во Франција, каде што во првата половина од годината електричните автомобили учествуваа со дури четвртина од вкупната продажба, но само една десетина од регистрираните нови автомобили за деловни цели.
Во Германија нивниот удел во вкупната продажба беше 17 отсто, но само 12 отсто во сегментот на деловни автомобили. Во Шпанија, електричните автомобили учествуваа со шест проценти од вкупната продажба, во споредба со само четири проценти во деловниот сегмент.
Полска е исклучок од групата бидејќи електричните автомобили за деловни цели учествуваа со 4,1 отсто од продажбата, во споредба со просечните 1,5 отсто.
На ниво на ЕУ, „деловните“ електрични автомобили учествуваа со 12,4 отсто од продажбата, во споредба со просечните 13,8 отсто.
„Целосно е нелогично и неприфатливо што сè уште инвестираме милијарди пари на даночните обврзници во технологија која е дијаметрално спротивна од програмата за зелена транзиција на Европската комисија“, рече директорот на T&E, Стеф Корнелис.
Деловните автомобили сочинуваат околу 60 отсто од продажбата на нови автомобили во Европа и се еден вид награда за работниците, често придружени со компензација за даноците на потрошувачите и потрошувачката на гориво.
