Јужна Кореја побара итно повлекување на севернокорејските војници распоредени во Русија. Јужнокорејската разузнавачка служба во петокот соопшти дека има докази дека Северна Кореја испратила 1.500 војници во Русија претходно овој месец за да „помогнат во војната на Москва против Украина“.
Украинскиот претседател Володимир Зеленски претходно изјави дека неговата влада има разузнавачки информации дека 10.000 севернокорејски војници се подготвуваат да им се придружат на руските сили.
За време на состанокот со рускиот амбасадор Георги Зиновиев, заменик-министерот за надворешни работи на Јужна Кореја, Ким Хонг-кјун, наводно, „остро го осудил“ распоредувањето на севернокорејските трупи, кои според него претставуваат „сериозна безбедносна закана“ за Јужна Кореја и меѓународната заедница.
Зиновиев рече дека соработката меѓу Москва и Пјонгјанг се одвива во согласност со меѓународните закони и не е насочена против безбедносните интереси на Јужна Кореја.
САД и НАТО не потврдија дека севернокорејските трупи се испратени во Русија, но извештаите за нивното присуство веќе предизвикаа загриженост во Јужна Кореја дека Русија може да и обезбеди на Северна Кореја софистицирани технологии кои можат значително да ги унапредат нејзините нуклеарни и ракетни програми во замена за трупите.
