Вера Журова, потпретседателката на Европската комисија во заминување вели дека познатиот технолошки милијардер Илон Маск е промотор на злото. Во интервју за „Политико“ таа изјави дека за разлика од другите техногиганти Маск не е во состојба да разликува добро од зло.
– Почнавме да го релативизираме злото, а тој проактивно помага во тоа. Тој е промотор на злото – рече Журова.
Чешката политичарка, која беше задолжена за правдата во ЕУ од 2014 до 2019 година и за „вредностите и транспарентноста“ од 2019 година, имаше редовни контакти со многу од најголемите светски технолошки компании во изминатата деценија за прашања како што се приватноста, дезинформацииte и умереностa на содржината.
Според неа големите технолошки компании имаат монструозна моќ во своите раце.
– Навистина се плашам од дигиталните платформи во рацете на лошите луѓе. Икс сега е главниот центар за ширење антисемитизам – рече Журова, додавајќи дека таа вчера ги предупредила министрите од главните градови на ЕУ да бидат претпазливи од можноста антисемитизмот на интернет да се прелее во реалниот свет.
Журова, исто така, го отфрли сè попопуларниот наратив дека прекумерната регулатива на Брисел ги задушува технолошките иновации.
ЕУ донесе низа закони за регулирање на дигиталниот свет во последните пет години, што доведе до тоа некои од најголемите светски технолошки компании да тврдат дека не можат да користат алатки за вештачка интелигенција и други иновативни производи во ЕУ, бидејќи не знаат како функционираат новите закони или како ќе се спроведуваат.
– Иновациите заради иновации не се нужно пожелни. Мораме да се погрижиме иновациите да се развиваат за да им прават добро на луѓето.
Илон Маск, еден од најбогатите луѓе на планетата, веќе некое време е во несогласување со европските претставници и се бори со регулаторите и владите на повеќе фронтови. Тој го купи Твитер во април 2022 година и набргу потоа го ребрендираше во Икс.
Европските политичари велат дека дозволил говорот на омраза непречено да се шири на платформата.
