Новиот закон за правична застапеност, кој ќе го замени балансерот, мора да биде во согласност со Уставот и препораките на Венецијанската комисија, рече денеска премиерот Христијан Мицкоски.
– Јас нема да бидам секундант, но она кое што го знам е дека новото законско решение мора да биде уставно и мора да биде согласно препораките на Венецијанската комисија. Затоа, можеби е подобро пред да биде донесено во Парламентот, да се испрати на мислење во Венецијанската комисија, за да не се доведуваме во состојба ние да се претвораме во уставно-правни експерти, а не сме, и да кажуваме како требало – рече Мицкоски.
Прашан за изјавата на градоначалникот на Тетово, Биљал Касами во врска со двојазични банкноти, Мицкоски посочи дека оваа изјава не е барање на Касами, туку негов коментар на политиката на ДУИ, кога е во опозиција.
– Изјавата на Касами не е во насока на тоа дека треба да имаме двојазични банконоти, туку изјавата е во насока на тоа да потенцира дека кога ДУИ вели дека има целосна имплементација на двојазичноста, во суштина не ја говори вистината, односно е измамник и ги мами луѓето. Тоа сакаше да каже. Повеќе е метафорично. Не е тоа барање, туку коментар на политиката на ДУИ во опозиција, затоа што кога ДУИ е на власт, има поинаква политика. Тогаш се важни тендерите, автомобилите… Кога се во опозиција, е тогаш е сосама поинаква состојбата – рече премиерот Мицкоски.
