Генералниот комесар на Агенцијата за палестински бегалци на Обединетите нации (УНРВА), Филип Лазарини, предупреди дека најмалку 400.000 луѓе се во суштина „заробени“ во северниот дел на Газа каде што „нема крај на пеколот“ бидејќи нема безбедно место на кое може да се побегне, објави британски Гардијан.
Тој рече дека многу луѓе во северниот дел на Газа, особено во бегалскиот камп Џабалија, најголемиот од осумте историски урбани бегалски кампови во Појасот Газа, сега одбиваат да ги почитуваат израелските наредби за евакуација, со кои им се кажува да одат на југ.
Израелската армија ја опколи Џабалија од неделата, како и другите околни населби, наредувајќи им на жителите да побегнат кон таканаречената „хуманитарна зона“ Ал-Маваси, иако таа е цел на смртоносни израелски воздушни напади и е сериозно пренатрупана.
Израелската војска тврди дека нејзините сили се во Џабалија за да се борат против милитантите на Хамас, да ја уништат нивната воена инфраструктура и да го спречат Хамас да се прегрупира.
„Засолништата плус услугите на ‘Унрва’ се принудени да се затворат. Некои се затвораат за првпат од почетокот на војната. Без речиси никакви основни залихи, гладот повторно се шири и се продлабочува.
Оваа неодамнешна воена операција го загрозува и спроведувањето на втората фаза од кампањата за вакцинација на децата против детска парализа. Децата, како и секогаш, први страдаат и најмногу страдаат. Тие заслужуваат многу подобро, заслужуваат прекин на огнот сега, заслужуваат иднина“, додаде Лазарини во неговата објава на социјалната мрежа Икс.
