На Марин Ле Пен, долгогодишната лидерка на француската крајнодесничарска партија Национален собир (РН), денеска и се суди во Кривичниот суд во Париз заедно со уште 26 лица и со самата РН за наводна проневера на средства на Европската унија.
Почнувајќи речиси една деценија по почетокот на првичните истраги, судењето потенцијално ја става Ле Пен на ризик да и биде забрането да извршува јавна функција до десет години поради обвиненијата, кои таа ги негира.
Ле Пен, која долго време работеше на подобрување на имиџот на својата партија, загуби од Емануел Макрон во вториот круг од француските претседателски избори во 2017 и 2022 година. Таа нашироко се смета за фаворит во следниот круг во 2027 година.
Партиски функционери и вработени, поранешни пратеници и парламентарни помошници беа обвинети дека користеле пари наменети за работа во Европскиот парламент за да ги платат вработените кои работеле за РН, која во тоа време се нарекувала Национален фронт.
Европскиот парламент ја процени штетата на 3,5 милиони евра, изјави правниот застапник.
Ле Пен, која седи со главната група евроскептични и националистички партии во Европскиот парламент и се залага за политика „Франција на прво место“ за прашања кои се движат од имиграцијата, енергетските пазари и земјоделството, ги негира наводите.
Доколку бидат прогласени за виновни, Ле Пен и другите обвинети би можеле да се соочат со потенцијална затворска казна до десет години и парична казна од еден милион евра. Покрај тоа, оние како Ле Пен кои беа избрани за функционери во времето на наводните прекршоци ризикуваат да добијат забрана за вршење јавна функција до десет години. Оние кои не се избрани функционери можат да добијат забрана за до пет години.
Јавното обвинителство во Париз започна истрага во 2016 година, поттикната од извештајот на претседателот на Европскиот парламент до францускиот министер за правда, по што следеше полициска истрага, пренесува Ројтерс.
