Документарниот филм „Време на бетон“ во режија на Игор Иванов ќе ја има својата интернационална премиера на 13. Фестивал за филм и архитектура во Прага. Проекцијата ќе се одржи на 29. септември во Националната галерија. Овој фестивал е единствениот во Чешка кој го истакнува значењето на архитектурата како важен дел од секојдневниот живот.
По премиерата, филмот ќе продолжи со прикажување на 18. Интернационален фестивал на архитектонски и урбанистички филм во Истанбул, кој ќе се одржи од 7 до 11 октомври. Проекцијата во Истанбул е закажана за 11 октомври, а „Време на бетон“ ќе се натпреварува за фестивалски награди заедно со 37 други филмови селектирани од 850 пријави од целиот свет.
Филмот нуди уникатен увид во архитектонската и урбаната историја на Скопје, со фокус на модерната архитектура од почетокот на дваесеттиот век. Сценариото е дело на Игор Иванов и на Томи Салковски, а нарацијата на Ѕвездан Георгиевски ја интерпретира актерот Никола Ристановски. Филмот е поддржан од Агенцијата за филм.
Проекциите на овие престижни фестивали претставуваат значајна можност за промоција на македонската култура и уметност на меѓународната сцена.
