Голманот Војчех Шчесни ќе потпише договор со Барселона во понеделник на 30 септември, објави новинарот Фабрицио Романо.
Триесет и четиригодишниот полски голман кој се пензионираше на крајот на август, ќе се врати во фудбалот за да го замени Марк-Андре тер Штеген во каталонскиот клуб, кој заработи тешка повреда на коленото и ќе пропушти околу осум месеци.
Шченсни имал бројни понуди да остане во Европа, но и да се пресели на Блискиот Исток или Америка – ги одбил сите. Сепак, поканата на Барселона ја сврти ситуацијата во друга насока. Имено, Роберт Левандовски, неговиот кум и добар пријател, имал главна улога во преговорите помеѓу клубот и Шчесни.
Детали за договорот на Шчесни со Барселона не се прецизирани.
Претходниот тим на фудбалерот беше Јувентус, за кој настапуваше од јули 2017 до август 2024 година. Шчесни бранеше и за Арсенал, Брентфорд и Рома.
