Русија соопшти дека планот на украинскиот претседател Володимир Зеленски да ја принуди Москва на мир е фатална грешка за која Киев ќе ги трпи последиците.
Зеленски му порача на Советот за безбедност на Обединетите нации дека војната меѓу Русија и Украина не може да се запре само преку преговори, туку дека Москва мора да биде принудена да постигне мир.
– Таквиот став е фатална грешка, системска грешка. Тоа е длабока заблуда која неизбежно ќе има последици за режимот во Киев – изјави портпаролот на Кремљ, Дмитриј Песков.
Песков рече дека Русија сака мир, но дека прашањето не може да се реши насила.
– Позицијата заснована на обид да се принуди Русија на мир е апсолутно фатална грешка бидејќи е невозможно да се принуди Русија да постигне мир – додаде тој и нагласи дека Русија поддржува мир, но дека за тоа ѝ се потребни гаранции.
Рускиот претседател, Владимир Путин, во јуни изјави дека Русија ќе стави крај на војната во Украина само доколку Киев се откаже од своите аспирации за членство во НАТО и целосно ги предаде четирите провинции што ги поседува Москва, услови кои Киев бргу ги отфрли и ги окарактеризираше како услови еднакви на предавање.
Украина и нејзините западни сојузници тврдат дека победата на Путин во војната треба да биде спречена бидејќи, доколку не се запре, ќе им се закани на другите земји од соседството.
