Климатските промени направија поројни дождови како оние што предизвикаа разорни поплави во централна Европа овој месец двапати поверојатно, според извештајот објавен во средата во кој авторите ги повикуваат политичарите да дејствуваат за да се запре глобалното затоплување.
Во најголемата поплава што ја погоди Централна Европа во најмалку две децении, 24 луѓе загинаа, згради беа оштетени, мостови се урнаа, а штетата се проценува на милијарди долари.
Извештајот на World Weather Attribution, меѓународна група на научници што ги проучува ефектите на климатските промени врз екстремните временски услови, откри дека четирите денови на врнежи што ги донела бурата Борис биле најобилните досега забележани во централна Европа.
Се вели дека климатските промени ги направиле таквите дождови најмалку двојно поверојатно и седум проценти пообилни.
„Овие поплави ги истакнуваат катастрофалните резултати од затоплувањето предизвикано од фосилните горива. Сè додека нафтата, гасот и јагленот не се заменат со обновливи извори на енергија, бурите како Борис ќе предизвикаат уште пообилни врнежи, предизвикувајќи поплави кои ја парализираат економијата“, рече Џојс Кимутаи, коавтор на студијата и истражувач во Институтот Грантам при Империал колеџ во Лондон.
Иако комбинацијата на временските шеми на бурата Борис – студениот воздух на Алпите и многу топол воздух над Медитеранот и Црното Море – е невообичаена, извештајот покажува дека климатските промени ги направија таквите бури поинтензивни и поверојатни.
Според извештајот, ваква бура се очекува да се случува во просек еднаш на секои 100 до 300 години во денешната клима, што е за 1,3 степени Целзиусови потопло од прединдустриското време.
Сепак, се вели дека таквите бури ќе резултираат со најмалку 5 проценти повеќе дожд и ќе се појават околу 50 проценти почесто отколку сега, ако затоплувањето од прединдустриското време достигне 2 степени Целзиусови, што се очекува во 2050-тите.
