Русија не се согласува со коментарот на турскиот претседател Реџеп Таип Ердоган дека Крим треба да се врати под контрола на Украина, изјави денеска портпаролот на Кремљ, Дмитриј Песков.
-Тука имаме сосема различни мислења. Во исто време, не се откажуваме од обидот да им го објасниме нашето гледиште, нашата позиција на нашите турски пријатели и колеги – рече Песков.
Ердоган претходно оваа недела рече дека поддршката на Турција за територијалниот интегритет, суверенитет и независност на Украина е непоколеблива и дека враќањето на Крим кон Украина, која Русија ја анектираше во 2014 година, е услов на меѓународното право.
Песков рече дека Ердоган е под притисок од САД поради традиционално блиските економски врски со Москва.
Оваа недела Кремљ најави можна посета на рускиот претседател Владимир Путин на Турција по завршувањето на подготовките.
Турција, членка на НАТО, одигра клучна улога како посредник за време на руско-украинската војна, првенствено кога станува збор за извозот на украинското жито кое долго време беше заглавено во пристаништата.
