По еднодневен прекин на сообраќајот на возовите во земјава поради штрајкот на машиновозачите, попладнево во 14.30 часот, со повторно пуштање во сообраќај на возот Скопје – Битола преку Велес и Прилеп, повторно е воспоставен железничкиот сообраќај во земјава, информираат за МИА од Железничката станица Велес.
Следен воз е возот кој од Скопје за Гевгелија поаѓа попладнево во 16.55 часот.Според информациите, прекинот на железничкиот сообраќај бил поради неисплатени додатоци на плата на машиновозачите и на кондуктерите за поминати километри и за минат труд, кои, по еднодневен штрајк, им биле одобрени од раководниот тим на ЈП Македонски Железници транспорт.
Инаку, поради штрајкот на машиновозачите и вчера и ова утро голем број патници од Велес и од другите попатни станици, најмногу од нив работници, ученици и студенти кои секојдневно патуваат за Скопје и имаат купени месечни билети од Железница, мораа да дадат дополнителни средства и до Скопје, наместо со воз, да патуваат со автобус. Голем дел од нив реагираат дека утрово дале дополнителни средства и задоцниле на работа или на училиште.
Како што информираат од Железничката станица во Велес, попладнево и утре утрината сите возови од Скопје и од Велес за Скопје и до останатите дестинации ќе сообраќаат според возниот ред.
