Косовскиот премиер Аљбин Курти на денешната седница на Владата изјави дека неговата вчерашна посета на општините на северот на Косово не била насочена против никого, туку дека целта им била „да ги разберат потребите што ги имаат овие општини“.
„Вчера заедно со министрите Џељаља Свеќља и Ељберт Красниќи ја посетивме општина Лепосавиќ, во селата Бистрица, Раје и Лешак, а потоа и во северна Митровица. Нашите посети на овие општини не се против никого, тие се неопходни за да се согледаат потребите што ги имаат овие општини, бидејќи ги оставаме настрана сите предрасуди на кои нашата влада се залага уште од првиот ден“, рече Курти.
Тој додаде дека целта на посетите била да се разбере „колку граѓаните се запоставени“.
Во овие општини има инвестиции кои ги немаше во претходните две децении, се додаваат услуги кои им недостигаа на граѓаните“, рече Курти.
Зборувајќи за затворањето на паралелните општини на северот на Косово, односно привремените власти кои беа под надлежност на Белград, Курти рече дека по извештаите и потврдените докази, косовските институции „презеле законски активности за нивно затворање“, откако било утврдено дека „ паралелни општини дејствуваат на окупираните области и вршат незаконски активности во северните општини“.
Тој додаде дека во тие згради ќе бидат сместени полициската канцеларија за издавање возачки дозволи, Центарот за социјална работа, службата за регистрација на возила, како и други служби на Министерството за економија, Министерството за индустрија и Министерството за заедници и враќање. .
„Нашата влада не затвора канцеларии, напротив ги отвора. Кој е за затворање и ограничување видовме на крајот на минатата недела. Групи маскирани лица во присуство на српската полиција на границата со Косово на територијата на Србија ја играа улогата на граничната полиција со запирање на патнички автомобили и легитимирање на патниците за утврдување на нивната етничка припадност. Нашите институции работеа за да им пропаднат плановите, а тие не успеаја“, рече Курти.
