Изјава на словачкиот премиер Роберт Фицо за „нацистичките ознаки на трупи во Украина“ го навлече бесот на Киев. Контроверзниот Фицо кој оваа година преживеа атентат е познат по своите силни изјави. При посетата на Музејот на Холокаустот во словачкиот град Серед тој рече:
– Сите зборуваме за фашизмот, нацизмот, а истовремено молчејќи го толерираме тоа што низ Украина итаат трупи кои имаат многу опасни ознаки, поврзани со проекти кои денес ги сметаме за опасни и забранети. Бидејќи ова е геополитичка битка, тие никому не пречат.
Фицо истакна дека светот е полн со лаги бидејќи, како што наведе, „од една страна меѓународната заедница зборува за злосторства, а од друга сè повеќе прави компромиси кои ја навредуваат позицијата на жртвите на холокаустот и расното насилство“.
– Меѓународната заедница мора да признае дека е невозможно да се дозволи во Украина да се борат трупи кои користат нацистички ознаки и кои често се однесуваат во согласност со тоа – додаде словачкиот премиер.
За украинскиото Министерство за надворешни работи изјавата на Фицо е разочарувачка и „се коси со постоечкото ниво на доверба и соработка меѓу Украина и Словачка“. Украинското МНР оценува дека украинските војници во моментов ги бранат своите блиски, домовите и земјата, „како и цела Европа и слободниот свет од руските освојувачи, означени со буквата „Z“, симболот, како што велат, „на фашистичката естетика на современа Русија“.
„За Украинците спротивставувањето на руската агресија е продолжување на историјата на отпорот на нашиот народ на тоталитарните режими во минатиот век“, се истакнува во соопштението на украинското МНР.
