Полицијата поднесе кривична пријава против девет лица поради сомнение за сторена „кражба“ бидејќи биле затекнати во незаконска сеча и дотур на дрва за огрев во шумски предел на местото викано „Кутуров дол“ во Кичево.
Како што информираат од Министерството за внатрешни работи, СВР Охрид до ОЈО Кичево поднело кривична пријава против 9 лица поради основано сомнение за сторено кривично дело „кражба”, а против 2 од овие лица е поднесена и кривична пријава за „спречување службено лице во вршење на службено дејствие”.
Сите девет лица, како што дополнуваат, се лишени од слобода и со кривичната пријава се предадени во ОЈО Кичево за понатамошна постапка.
„Вчера во координирана акција на Одделот за криминалистичка полиција, СВР Охрид и Одделот за специјални полициски операции-Единица за брзо распоредување, на територија на општина Кичево во место викано „Кутуров дол“ затекнати се лица во незаконска сеча и дотур на дрва за огрев во шумски предел, и покрај активната забрана за движење во шума“, се вели во соопштението од МВР.
Лицата биле без соодветни дозволи и документација за сеча, дотур и превоз на огревни дрва.
„Од нив се одземени мобилните телефони и предмети за кои се претпоставува дека ги користеле за извршување на кривичното дело, како и товарно моторно возило „ман” и џип „опел фронтера”, двете со кичевски регистарски ознаки“, се додава во соопштението.
МВР соопшти дека и во месноста викана „Мала река“ биле лишени од слобода 3 лица и одземени 2 трактора со приколки и едно возило „цитроен џампер“, како и моторна пила и повеќе канистри за бензин.
фото: МИА
